Članovi UBNOR-a i antifašista Nikšić, kao niko u okviru ove asocijacije, baštine tradicije NOB-a i stalno podsjećaju svoje sugrađane na borce koji su položili svije živote za slobodu. A u našem gradu i okolini je na stotine značajnih lokacija na kojima su se odigravale velike borbe. Neke od njih su označene spomeničkim obelježjima, ali ima ih još koje to zaslužuju.
Ova kratka priča vezana je za 9. maj, Dan pobjede nad fašizmom, sada Dan Evrope. Tog datuma delegacija UBNOR-a i antifašista Nikšić je posjetila Konjsko i spomenik narodnom heroju Danilu Bojoviću, koji je tu ubijen od župskih četnika. Istog dana kraj spomenika se našla grupa učenika Osnovne škole „Dušan Bojović“ iz Župe, sa direktoricom Vesnom Mijušković i dva nastavnika, dok je još jedna grupa njenih đaka bila istog dana na spomenik Partizanu borcu na Gorici. Bilo je tu nekoliko članova porodice Bojović.
Nakon polaganja cvijeća, uspomenu na Danila Bojovića, hrabrog partizana i komunistu, evocirao je Slobodan Bato Mirjačić, predsjednik UBNOR-a i antifašista našeg grada. Bilo je tu i đačkih recitacija, a učenica Žana Radulović je govorila o aktivnostima učenika iz Župe, sa posebnim naglasdkom na očuvanju tradicije borbe za slobodu i posjeta kulturnim ustanovama u našoj državi.
Tekst i snimak: Blagoje Đukanović
